Әкім Берік Уәли “Таза Қазақстан” сенбілігіне белсенді қатысуға тұрғындарды шақырды,-деп хабарлайды jurtmedia.kz.
Абай облысының әкімі Берік Уәли өңір тұрғындарына арнап арнайы бейнеүндеу жасады. Облыс басшысы бұл бастаманың бір реттік акция емес, жыл бойы жалғасатын дәстүрге айналуы қажеттігін атап өтті.
«Абай облысы – ұлы тұлғаның атымен аталған, тарихы терең, табиғаты көркем өңір. Оны таза, жайлы, көрікті ету – баршамыздың азаматтық борышымыз», – деді өңір басшысы.
Әкімнің айтуынша, облыстың даму мүмкіндіктері зор. Ертіс өзенінің бойында орналасқан Семей қаласы бүгінде көлік-логистикалық хаб ретінде қалыптасып келеді.
Берік Уәли Мемлекет басшысы Қасым-Жомарт Тоқаевтың «Қалалар мен ауылдардың таза болуы – өзіміз үшін қажет» деген сөзін мысалға келтіріп, қоғамдағы азаматтық жауапкершілікті арттыруға үндеді.
Бастаманың тиімділігін арттыру мақсатында облыста арнайы байқау жарияланбақ. «Үздік аудан», «үздік ауыл», «үздік аула», «үздік университет», «үздік мектеп» сынды номинациялар бойынша тазалыққа үлес қосқан ұйымдар мен азаматтар анықталып, қомақты сыйлықтармен марапатталады.
Абай облысында 2024 жылы:
- 400 шақырым жол жөнделеді,
- «Ауыл – Ел бесігі» бағдарламасы аясында 223 шақырым жол жаңартылады,
- 77 мың түп ағаш отырғызылады,
- Семейде 22 аула, 8 қоғамдық орын абаттандырылады,
- 210 автобус аялдамасы орнатылып, 60 жаңа автобус сатып алынады,
- 110 көше жарықтандырылып,
- жылу жүйелерін жаңғыртатын 6 жоба жүзеге асады.
Бұл шаралар өңірдің тұрғын үй, білім беру және қызмет көрсету салаларындағы инфрақұрылымын жаңғыртуға жол ашады.
Әкім шет мемлекеттердің тазалыққа ерекше мән беретінін атап өтті. Мәселен, Эстонияда басталған акция кейін «Әлемдік тазалық күніне» айналған, ал Жапонияда тазалық күндері жиі өтеді. Бұл – ұлттық мәдениеттің айнасы.
Берік Уәли облыс тұрғындарын, бизнес өкілдерін, оқу орындарын, жастар мен еріктілерді тазалық шараларына белсенді қатысуға шақырды. «Тазалық – ұлтқа деген құрметтің айнасы. Бұл – ішкі құндылығымыздың көрінісі», – деді өңір басшысы.
2024 жылы Абай Құнанбайұлының 180 жылдық мерейтойы атап өтілетінін еске салған әкім, бұл шараға жоғары деңгейде дайындалу қажеттігін айтты.
