Жетісу облысы, Үштөбе қаласында өткен сот отырысында істі тергеп-тексерген екі тергеушіден жауап алынды,- деп хабарлайды, Jurtmedia.kz ақпараттық-сараптамалық порталы.
Сот процесінде жауап алу барысында алғашқы болып Үштөбе станциясы көліктегі полиция бөлімінің тергеушісі Асанов Қуат тараптардың сұрақтарына жауап берді. Ол өз сөзінде 2024 жылдың қараша айының 4-9 аралығында қылмыстық оқиға болған жерді тексеру барысында темір жол бойынан жымқырылды деген M22 кодтық маркасы бар бұрандаларды санап шыққанын айтты. Ол екі күн бойы Үштөбе станциясына қарасты «Солтүстік» және «Көксу» мойыншасын қарап шыққан. Тексеру барысында сотталушы Байдилданов тарапынан қолды болды деген M22 кодтық маркасы бар бұрандалардың тиісті орынға орнатылғанын көрген.
Одан кейін жауап берген осы іске қатысты тергеу тобының басшысы Тимур Әділханұлы да алдыңғы әріптесінің сөзін нақтылады.
Оның айтуынша, оқиға болған жерге барған тергеу тобы мүшелері станцияға жеткізілген жалпы көлемі 1 тонна болатын яғни 1785 дана бұранданың 1678 данасы тиісті орындарға орнатылып тұрғанын анықтағандарын жеткізді.
Бұған қоса станция аумағынан әлі орнатылып үлгермеген 54 дана бұранданы айғақ зат ретінде алып кеткендерін мәлімдеді.
Осы жерде адвокат Жақсылық Тұрсынбайдың, «Сіздіңше айыптау кезінде өздеріңіз жымқырылды деген бұрандалар жоқ емес бар болып тұр ма?»,-деген сауалына, «иә біз барғанда болды, бірақ алдыңғы ҚТЖ тарапынан келген ревизия кезінде жоқ болғандықтан Байдилданов жымқырған деп санаймын», — деді. Оның айтуынша ҚТЖ ревизорлары кеткен соң сотталушы Байдилданов қарамағындағы жұмысшыларды ұйымдастырып, тергеушілер келгенге дейінгі аралық уақытта бұрандаларды сол орындарға ауыстырып қойып үлгерген.
Қорғаушы, «Сіздер анықтаған 1678 дана бұранданы ҚТЖ-ға келтірілген жалпы шығыннның (1785 дана) көлемінен неге шегеріп тастамасқа?»,- деген сұрақ қойды. Оған тергеу тобының басшысы, «Байдилданов бұл бұрандаларды басқа жақтан алып келіп қоя салған шығар»,-деген екіұшты болжамды жауап берді.
«Сіз ойлап тұрғандай болса, Байдилдановтың ол бұрандаларды қайдан алып келіп қойғанын анықтадыңыздар ма?», деген қорғаушының келесі сауалына, тергеуші «Ол мүмкін болмады», — жауап берді.
Сот отырысын тыңдау барысында мәселенің барлығы «Қазақстан темір жолы» ҰК АҚ тарапынан келген ревизорлық тексерудің атүсті болғандығынан туындағанын аңғаруға болатын сияқты.
Оған, осы іске қатысты арыз түсірген Достыбаев сотталушы Байдилдановпен екеуара дауыстық хабарлама негізіндегі әңгімесінің жазбасында «Біз ҚТЖ қызметкерлерімен тексеріс жүргізген кезде М22 маркалы бұрандалары кездесті, бірақ біз оларды тіркеген жоқпыз» деген сөзі дәлел бола алады. Бұл жазба сот барысында тыңдалған. Бізбен сөйлескен тағы бір азамат, сотта куә ретінде жауап беріп жатқан Амир Мұханұлы да өзінің сол тексерушілер жанында болғанын айтты. Оның сөзінше тексерушілер ешқандай да маркалық номерлерге назар аудармаған. Ондай бұрандаларды іздемеген де.
Мен осы жерде жол шебері болып жұмыс істеймін. Біз М22 маркалы бұрандаларды темір жол бойындағы қажетті жерлерге 2023 жылдың тамыз айымен 2024 жылдың қаңтар айы аралығында ауыстыру жұмыстарын жүргіздік. ҚТЖ-дан тексерушілер келген кезде де өзім ішінде болдым. Олар тексеру жұмысы барысында М22 маркалы бұрандаларды көрсетуді талап еткен жоқ.
Алайда олар, тексеріс соңында М22 маркалы бұрандалар жоқ деген акт толтырды. Мен өз басым келіспейтінімді айтқаныммен мені мәжбүрлі түрде қол қоюға көндірді,-дейді А. Мұханұлы.
Сот процесі кезінде мемлекеттік айыптаушы, тергеу тобының басшысына; «Сіздер өздеріңіз анықтаған 1678 дана бұранданы сараптама жүргізген маманға неге ұсынбадыңыздар?»,-деген сұрақ қойды. Жауап беруші, «Оны сарапшылар сұраған жоқ»,-деген күлкілі жауап берді.
Артынша іске төрелік етіп отырған судья да осы сауалды нақтылап тағы сұрады.
Сот отырысының сол күнгі қорытындысы бойынша судья істі нақтылап, айғақ заттар мен берілген жауаптарды саралап қорытынды шығару үшін сараптама тағайындауға шешім шығарды. Сараптама жасау үшін іс материалдары Алматыдағы Сараптама институтына жолданатын болды.
Сот процесі аяқталған соң журналистік зерттеу жүргізу мақсатында соталушымен бірге Үштөбе станциясына бардық. Сол жерде жымқырылды деген М22 маркалы бұрандалардың орнатылып тұрғанын біз де өз көзімізбен көрдік.
Күдікті ретінде танылып отырған Бекет Байдилданов бізге жоғалды деген бұрандаларды көрсетіп, олардың қашан қалай орнатылғандығын егжей-тегжейлі түсіндіріп берді.
Мен өз жауапкершілігімде қабылдап алған М22 маркалы бұрандалардың басым бөлігін ҚТЖ-дан резизорлық тексеріс келгенге дейін қажеттілігіне қарай кезең-кезеңімен жұмысшыларға тапсырма бере отырып орнатып қойдым. Орнатылмаған 54 дана бұранда осы станция аумағында тұрды. Оны ешкім ешқайда алып кеткен жоқ. Кейін тергеушілер келіп айғақ зат ретінде алып кетті. Өкінішке орай тергеу мен сотта осы сөздерімді дәлелдей алмай жатырмын. Дегенмен, судья әділ шешім шығарады деп сенемін, -дейді сотталушы, ҚТЖ ҰК-на қарасты Үштөбе станциясының телім бастығы Бекет Байдилданов.
Келесі сот отырысы Сараптама институтының қорытындысы келген соң жалғасатын болды. Процеске жәбірленуші жақтың өкілі ретінде қатысқан «Қазақстан темір жолы» ҰК АҚ «Магистральды желі дирекциясы» заңгері берілген жауаптар мен дәлелдерге қатысты ешқандай қарсылық білідірген жоқ.
Айта кетейік, осының алдында редакцияға өзінің кінәсіз екендігін айтып, әділдік іздеп хабарласқан Бекет Байдилдановтың айтуы бойынша материал жазған болатынбыз. Аталған мәселе Сот іске соңғы нүктесін қойғанға дейін тақырып Jurtmedia.kz тілшілерінің назарында болады.
