Парижде өтіп жатқан төрт жылдықтың басты додасында бокстан жерлесіміз Нұрбек Оралбай жартылай финалда доминикандық қарсыласынан басым түсті, деп хабарлайды Jurtmedia.kz ақпараттық порталы.
Осылайша ол 80 келі салмақта Жазғы олимпиада ойындарының финалына жолдама алды. Нұрбек Оралбайдың қарсыласы Доминикан республикасының намысын қорғап келген Кристиан Хавьер Пиналес болды. Алайда ол қазақ спортшысынан айласын асыра алмады. Есеп: 3:2
Айта кетейік аталмыш жарысқа бокстан барған Қазақстан құрамасынан жалғыз Нұрбек Оралбай ғана жартылай финальға дейін жете алды. Ол 2023 жылы Ташкентте өткен әлем чемпионатында чемпион атанған. Парижге барған қалған салмақтағы барлық боксшыларымыз алғашқы жекпе-жектерінде жеңіліс тауып, жарыс жолын ерте аяқтауға мәжбүр болды.
Нұрбектің финалдағы қарсыласы кешкі сессияда украиналық Олександр Хижняк пен кубалық Арлен Лопес арасындағы жекпе-жектен соң анықталады. Осы екі спортшының жеңгені біздің жерлесімізбен ақтық сында Олимпиада алтыны үшін таласатын болады.
